Mainane a Botswana a tlosa bodutu, a a ruta
ebile a rotloetsa popagano ka a atamalanya
losika bogolo jang bana le bo nkuku ba bone.
Se se farologanyang mainane a Botswana le a
mafatshe a mangwe ke mokgwa o a tlhabiwang
ka teng, ka a tlhabiwa ke bo nkuku bosigo go
itisitswe go kgobokanwe fa molelong ngwedi e
tlhatswitse le dinaledi di tsabakela mo loaping.
Seemo se se fa leinane tatso le go tlogela
bareetsi ka maitemogelo a sennela ruri go tswa
mo leinaneng.
